Վրաստանում Archives

Վրաստանում այլևս НТВ+ չեն նայում

16/06/2011

Համաձայն Վրաստանի հեռահաղորդակցությունների ազգային հանձնաժողովի հունիսի 10-ի հրամանի՝ Վրաստանում գործող բոլոր կաբելային հեռուստաընկերությունները, որոնց թիվը հասնում է 90-ի, պարտավոր են դադարեցնել «НТВ+ премьера», «НТВ+ кино клуб» և «НТВ+ кино хит» հեռուստաալիքների հեռարձակումները:

Ըստ նույն հրամանի՝ հեռուստաընկերությունները պետք է հանձնաժողովին ներկայացնեն փաստաթղթեր, որոնք թույլ են տալիս հեռարձակումը Վրաստանի տարածքում:

Հրամանը հիմնված է Super TV կաբելային հեռուստաընկերության դիմումի վրա: Վերջինս մեղադրում է մրցակիցներին ռուսական ալիքների ապօրինի հեռարձակման մեջ: Super TV-ն, որը վրացական շուկա է մտել 2011 թվականի հունվարին, առաջարկում է 40-ից ավելի ալիքներ՝ բացառությամբ «НТВ+» փաթեթի, քանի որ նման թույլատվություն չունի:

Silknet ընկերությունը, որի SILK TV ինտերակտիվ հեռուստաալիքն ունի շուրջ 14 000 բաժանորդ, արդեն փոխարինել է «НТВ+»-ը հեռուստադիտողների ցանկությամբ ցուցադրվող ֆիլմերով:

Աղբյուր: Media.ge

IDFI-ը հրապարակում է Վրաստանում 1956-ի մարտին լույս տեսած թերթերի հավաքածուն

08/06/2011

Մի շարք «Հույժ գաղտնի» արխիվային փաստաթղթերի հետ միասին՝ Վրաստանի Տեղեկատվության ազատության զարգացման ինստիտուտը հրապարակել է Խորհրդային Վրաստանում 1956 թվականի մարտին լույս տեսած թերթերի հոդվածներից հատվածներ:

1956 թվականի փետրվարի 25-ին Կոմկուսի XX համագումարի ժամանակ ԽՍՍՄ Կոմունիստական կուսակցության Կենտրոնական կոմիտեի առաջին քարտուղար Նիկիտա Խրուշչևը դատապարտեց «Ստալինի պաշտամունքը», ինչն այն ժամանակվա համար անսպասելի և սենսացիոն հայտարարություն էր: Խրուշչովի ճառը գաղտնի մնաց մինչև գորբաչովյան ժամանակները: Չնայած այս փաստին` այն շրջադարձային եղավ Խորհրդային համակարգի համար` առաջացնելով խորհրդային ժողովրդի դժգոհությունը, իսկ Վրաստանում հանգեցնելով մասսայական ցույցերի:

Ինստիտուտը համոզված է, որ այս հավաքածուն լիովին նկարագրում է 1956-ի իրադարձությունները, և հույս ունի, որ այն կօգնի ԽՍՀՄ բոլոր հետազոտողներին և գիտնականներին:

Աղբյուր: Media.ge

Վրաստանում գործում է հասարակական տեղեկատվության վիճակագրական կայք

27/03/201114/02/2022

Վրաստանում սկսել է գործել GiveMeInfo անունը կրող նոր կայքը, որի նպատակը հասարակական տեղեկատվության հոսքը ավելի բաց դարձնելն է:

Կայքի ստեղծման մտահաղացումը վրացի լրագրող Դավիթ Չագանավաինն է: Անցյալ տարի Թբիլիսիում այս նախագծով նա Կովկասի սոցիալական նորամուծությունների ճամբարի հաղթող ճանաչվեց: Շահած գումարի և Վրաստանի բաց հասարակություն հիմնադրամի ֆինանսական աջակցության շնորհիվ http://givemeinfo.ge կայքը դարձավ իրականություն:

Կայքի բովանդակությունը լրացնում են հենց օգտվողները՝ նրանք, ովքեր առավել հաճախ հասարակական տեղեկատվության կարիք ունեն, մասնավորապես, լրագրողները և ՀԿ-ների ներկայացուցիչները: Մուտքագրվող տեղեկությունները գաղտնի են: Տեղեկություն ստանալու համար պահանջվում է պատասխանել հայցադիմումի մի քանի հարցի:

«Կայքը ցույց կտա, թե ինչպես են տարբեր գործակալություններ և նախարարություններ զբաղվում հասարակական տեղեկատվության հոսքով: Այն տեղեկատվության հոսքը պատկերող քարտեզի կնմանվի: Դեռ ոչ բոլորը գիտեն կայքի մասին, այդ պատճառով տեղեկատվությունը դեռ շատ չէ: Չգիտես՝ ինչու, շատերը մտածում են, որ գործընթացը ժամանակատար է, մինչդեռ այն մի քանի րոպե է տևում», – ասել է Դավիթ Չագանավան Media.ge կայքին: