Ձերբակալվել է Սաակաշվիլիի անձնական ֆոտոլրագրողը
Վրացական լրատվական գործակալությունները հայտնում են, որ ձերբակալվել են նախագահի անձնական ֆոտոլրագրող Իրակլի Գեդենիձեն և նրա կինը: Արտաքին գործերի նախարարության մամուլի կենտրոնի լուսանկարիչ Գիա Աբդալաձեն, Եվրոպական ֆոտոլրատվական գործակալության աշխատակից Զուրաբ Կուրցիկիձեն և ֆոտոթղթակից Շախ Այվազովը` Associated Press-ից նույնպես ձերբակալված են:
InterPressNews լրատվական գործակալությունը մեջբերում է Գիա Աբդալաձեի կնոջ խոսքերը, որը ենթադրում է, որ իր ամուսնուն մեղադրում են լրտեսության մեջ (հոդված 314 Վրաստանի ՔՕ):
Համաձայն Ներքին գործերի նախարարության հայտարարության՝ ձերբակալվածները մեղադրվում են օտարերկրյա կառավարություններից մեկի հովանու ներքո գործող հետախուզական կազմակերպությանը Վրաստանի շահերին վնասող տեղեկատվություն տրամադրելու մեջ:
ՆԳ նախարարությունը հետաքննություն է սկսել:
Ըստ վերջին տվյալների՝ Associated Press-ի ֆոտոթղթակից Շախ Այվազովին ազատ են արձակել: Այս մասին հայտնել է նրա կինը:
Աղբյուր: Media.ge