լրագրողին Archives

Իրանը ութ տարով ազատազրկել է ամերիկացի լրագրողին

23/08/2011

Արտահաստիքային լրագրող Շեյն Բաուերը և էկոլոգ Ջոշ Ֆաթթալը դատապարտվել են ութ տարվա ազատազրկման իրանական բանտում: Նրանք մեղադրվում են լրտեսության և երկիր ապօրինի մուտք գործելու մեջ: Նրանք ձերբակալվել են երկու տարի առաջ` Իրանի և Իրաքի սահմանի մոտակայքում արշավելիս: Հարավային Կալիֆորնիայի բնակիչ Սառա Շրաուդը նույնպես ձերբակալվել էր, սակայն շուտով ազատ է արձակվել:

Երեք արշավորդներն էլ Կալիֆորնիա նահանգի բնակիչներ են: Բաուերը թղթակցել է «Լոս Անջելես Թայմսին», «Սան Ֆրանցիսկո Քրոնիքլին» և «Սան Ֆրանցիսկո Բեյ Գարդիանին»:

Աղբյուր: Mediabistro.com

Գերմանիան Իրանից պահանջում է ազատ արձակել լրագրողին

01/07/2011

Չորեքշաբթի օրը Գերմանիայի կառավարությունը հայտարարեց, որ վրդովված է իրանցի կին մարզական լրագրողի ձերբակալմամբ, ով անցած շաբաթ պետք է մեկներ Գերմանիա ֆուտբոլի կանանց աշխարհի առաջնությունը լուսաբանելու:

Բեռլինի մարդու իրավունքների գլխավոր պաշտպան Մարկուս Լյոնինգը հայտարարություն է տարածել, ըստ որի լրագրող Մարյամ Մաջդի ձերբակալությունը ուղղակիորեն կապված է նրա գործունեության հետ: Լրագրողը պայքարում է կանանց իրավունքների՝ մասնավորապես կանանց ստադիոն գնալու թույլատվության համար:

«Զուգադիպություն չէ, որ Մաջդը, ով պայքում է սպորտային միջացառումներին կանանց մասնակցության համար, ձերբակալվել է իրանական անվտանգության ուժերի կողմից նախատեսված մեկնումից առաջ», – ասել է Լյոնինգը:

«Սա իրանական ռեժիմի կողմից կանանց իրավունքների պաշտպանների ճնշման ևս մեկ տխուր օրինակ է»:

Լյոնինգը կոչ է արել Իրանի կառավարությանը անմիջապես ազատել Մաջդին և մնացած բոլոր կանանց իրավունքների պաշտպաններին և «վերջապես կատարել մարդու և քաղաքացիական իրավունքների պարտավորությունները, որոնց տակ ստորագրել է Իրանը»:

Աղբյուր: Supersport.com

Ռուս լրագրողին սպանել են իր բնակարանում

22/06/2011

«Կոլիմա պլուս» հեռուստաընկերության գլխավոր խմբագիր Անատոլի Բիտկովը չորեքշաբթի առավոտյան հայտնբերվել է սպանված իր բնակարանում՝ Մագադան քաղաքում:

Ռուսաստանի հետաքնչական հանձնաժողովի ներկայացուցիչը հայտնել է, որ հարուցվել է քրեական գործ:

38-ամյա Բիտկովը Ռուսաստանի լրագրողների միության անդամ էր: Նա լրատվական և վերլուծական հաղորդումների հեղինակ և վարող էր:

Աղբյուր: RIA Novosti

ՊԻԿ հեռուստաալիքի լրագրողին վտարում են Ռուսաստանից

01/06/2011

Մոսկվայի քաղաքային դատարանը երեկ որոշում է ընդունել հեռացնել երկրից Առաջին տեղեկատվական կովկասյան հեռուստաալիքի լրագրող Նատիա Փոլադաշվիլուն:

Ինչպես հայտնում է Кавказский узел կայքը՝ մայիսի 30-ին Աբխազիայի նախագահ Սերգեյ Բաղապշի հուղարկավորման արարորողության ժամանակ ձերբակալվել են ՊԻԿ հեռուստաալիքի թղթակիցներ Ալեքսեյ Մատվեևը և Նատիա Փոլադաշվիլին: Մատվեևին տուգանել են 500 ռուբլի գումարով, իսկ Փոլադաշվիլու գործը ուղարկվել է դատարան:

Մայիսի 31-ին դատարանը որոշում է ընդունել Ադրբեջանի քաղաքացի Նատիա Փոլադաշվիլուն վտարել երկրից, հայտնում է «Грузия Onlinе»-ը:

Ինչպես հայտնել են մայրաքաղաքի իրավապահ մարմինները՝ լրագրողները նկարահանում էին իրականացնում և հարցազրույցներ վերցնում առանց հավատարմագրման փաստաթղթերի:

Հատկանշական է, որ մարտի 2-ին տեղի ունեցած Մոսկվա-Թբիլիսի հեռուստակամրջի ժամանակ ռուսական կողմը մեղադրել է ՊԻԿ հեռուստաալիքին այն բանում, որ վերջինս ապակայունացնում է իրավիճակը Կովկասում և նպաստում ՌԴ-ի քայքայմանը: Հեռուստաալիքի ղեկավարությունն էլ հայտարարել է օբյեկտիվ հաղորդումներ պատրաստելու իր նպատակների մասին:

Աղբյուր: http://www.kavkaz-uzel.ru/

ՀՖՖ նախագահի առաջարկով Անդրեասյանը չճանաչվեց անցանկալի անձ ֆուտբոլում

23/05/2011

Ինչպես հայտնում է Totalfootball.am կայքը՝ մայիսի 23-ին կայացավ ՀՖՖ գործադիր կոմիտեի նիստը, որի առաջին կետն էր «Արարատի» գլխավոր մարզիչ Արկադի Անդրեասյանի և Totalfootball.am-ի ֆոտոթղթակից Աշոտ Առուշանյանի միջև տեղի ունեցած միջադեպի հարցը: ՀՖՖ կարգապահական կոմիտեն գործադիր կոմիտեին առաջարկել էր Արկադի Անդրեասյանին ճանաչել ֆուտբոլում ոչ ցանկալի անձ:

ՀՖՖ նախագահ Ռուբեն Հայրապետյանը գործադիր կոմիտեին առաջարկեց Անդրեասյանին չճանաչել ֆուտբոլում ոչ ցանկալի անձ և բավարարվել միայն զգուշացմամբ, ինչպես նաև ուժի մեջ թողնել 10 խաղի որակազրկումը և 250 հազար դրամ ֆինանսական տուգանքը: Գործկոմը միաձայն ընդունեց այդ առաջարկը:

Հիշեցնենք, ապրիլի 23-ին կայացած Հայաստանի առաջնության հերթական տուրի Փյունիկ – Արարատ խաղի ընդմիջմանը Արկադի Անդրեասյանը իրեն ուղեկցող անձանց հետ միասին ծեծի էր ենթարկել ֆոտոլրագրողին:

Աղբյուր: Totalfootball.am

Հակադարձ հարված. լեգենդար ֆուտբոլիստը հավակնում է դառնալ անցանկալի անձ ֆուտբոլում

29/04/201114/02/2022

Totalfootball.am կայքի հաղորդմամբ՝ ապրիլի 28-ին տեղի ունեցավ Հայաստանի ֆուտբոլի ֆեդերացիայի կարգապահական կոմիտեի հերթական նիստը, որտեղ որոշում ընդունվեց «Արարատ» թիմի գլխավոր մարզիչ Արկադի Անդրեասյանի գործի վերաբերյալ, ով անցյալ շաբաթ «Հրազդան» մարզադաշտում ծեծի էր ենթարկել Totalfootball.am կայքի 19-ամյա ֆոտոլրագրող Աշոտ Առուշանյանին:

Ըստ կայացրած որոշման՝ Անդրեասյանը խուլիգանական արարքի համար որակազրկվել է 10 խաղով, իսկ «Արարատ» ակումբը տուգանվել` 250.000 դրամով:

«Արարատը» պարտավորված կլինի վճարել ևս 150.000 դրամ ակումբի անվտանգության պատասխանատու Արթուր Արզումանյանի պահվածքի համար, որն «օգնել» է Անդերասյանին ծեծի ենթարկել ֆոտոլրագրողին:

ՀՖՖ մամուլի քարտուղարությունը հաղորդում է, որ Երևանի «Արարատի» գլխավոր մարզիչ Արկադի Անդրեասյանի կապակցությամբ կարգապահական կոմիտեն նաև առաջարկել է ՀՖՖ գործկոմին նրան ճանաչել անցանկալի անձ ֆուտբոլում։ Անդրեասյանը տարիներ առաջ նման կարգավիճակում եղել էր, սակայն հետագայում որոշումը ֆեդերացիան փոխեց։

Ֆուտբոլային հարված. լեգենդար ֆուտբոլիստ – մարզիչը ծեծել է լրագրողին

26/04/201114/02/2022

Ինչպես տեղեկացնում է Totalfootball.am կայքը՝ Totalfootall.am-ի ֆոտոլրագրող Աշոտ Առուշանյանն ապրիլի 23-ին կայացած Հայաստանի ֆուտբոլի առաջնության վեցերորդ տուրի «Արարատ» – «Փյունիկ» հանդիպման ընդմիջմանը (1:4 (0:2)) ծեծի է ենթարկվել Երևանի «Արարատի» գլխավոր մարզիչ Արկադի Անդրեասյանի և նրան ուղեկցող անձանց կողմից, այն բանից հետո, երբ կատարում էր իր աշխատանքը և լուսանկարում էր տրիբունայում գտնվող մասնագետին: Առաջին հարվածը հասցրել է հենց Անդրեասյանը, ապա նրան ուղեկցողները դաժանորեն ծեծել են Առուշանյանին «Հրազդան» մարզադաշտի թունելում:

19-ամյա ֆոտոլրագրողը ծնոտի վնասվածքի և գլխացավերի պատճառով երեկոյան շտապօգնության մեքենայով տեղափոխվել է հիվանդանոց, սակայն հաջորդ օրը առավոտյան դուրս է գրվել հիվանդանոցից: Հետազոտությունները ցույց են տվել, որ լրագրողի մոտ դեմքի հատվածում առկա են մկանային վնասվածքներ, իսկ ոսկրային կոտրվածքներ չկան: Ծնոտի ցավերի պատճառով 19-ամյա ֆոտոլրագրողը դեռևս դժվարանում է ուտել և խմել, հայտնում է Totalfootball.am-ը:

Ըստ կայքի դեռևս չճշտված տվյալների՝ այս միջադեպի հետ կապված Արկադի Անդրեասյանն առնվազն մինչև կեսգիշեր (այսինքն՝ առնվազն վեց ժամ) գտնվել է ոստիկանական բաժանմունքում, որտեղ հարցաքննության է ենթարկվել:

«50 ֆաթուլաևներ» Լոնդոնում պահանջում են ազատ արձակել լրագրողին

20/04/201114/02/2022

Բանտում գտնվող լրագրող Էյնուլլա Ֆաթուլաևին նվիրված բողոքի ցույցի մասնակիցները լրագրողի դեմքը պատկերող դիմակներով այսօր՝ ապրիլի 20-ին, հավաքվելու են Լոնդոնում Ադրբեջանի դեսպանատան առջև: Լոնդոնում գտնվող մարդու իրավունքների պաշտպանության հինգ կազմակերպությունները նման կերպ կնշեն ադրբեջանցի լրագրողի ձերբակալման չորրորդ տարելիցը:

«Հիսուն ֆաթուլաևներ» դեսպանին կհանձնեն Ադրբեջանի իշխանություններին հասցեագրված նամակ, որում պահանջում են անմիջապես և առանց վերապահումների ազատել Ֆաթուլաևին և փոխհատուցել տույժը: Վերջին մեղադրանքը, որի համար նա գտնվում է բանտում, կապված է թմրադեղեր պահելու հետ, որը սակայն ենթադրաբար կեղծված է Ֆաթուլաևին բանտում պահելու համար՝ հակառակ 2010 թվականի ապրիլին Եվրոպական դատարանի կայացրած որոշման:

Աղբյուր: Article19.org

Թուրքիան օգնում է ազատել Guardian-ի լրագրողին Լիբիայում

21/03/201114/02/2022

Հայտնի է դարձել, որ թուրքական կառավարությունը կարևոր դեր է խաղացել Լիբիայի բանտում հայտնված Guardian-ի լրագրողին ազատելու գործում:

Լրագրող Աբդուլ-Ահադը ձերբակալվել էր Լիբիայի իշխանությունների կողմից երկու շաբաթ առաջ՝ մարտի 2-ին, Սաբրաթա ծովափնյա քաղաքում մեկ այլ բրազիլացի լրագրողի հետ միասին:

Նրան ազատ են արձակել չորեքշաբթի օրը, երբ Guardian-ի գլխավոր խմբագիր Ալան Ռասբրիգերը ժամանել էր Տրիպոլի:

Ռասբրիգերը հայտնել է, որ Թուրքիայի կառավարությունը, որը ներկայացնում է Միացյալ թագավորության շահերը Լիբիայում այն բանից հետո, երբ փակվել է Բրիտանիայի դեսպանատունը, ակտիվորեն ներգրավված է եղելԱբդուլ-Ահադին ազատ արձակելու համար վարվող բանակցությունների մեջ:

Աղբյուր: The Guardian

Netgazeti կայքի լրագրողին արգելել են նկարահանել Վրաստանի առաջին տիկնոջը

17/03/201114/02/2022

Մարտի 15-ին Netgzeti առցանց պարբերականի լրագրող Նինո Կախիշվիլիին արգելել են նկարահանել Վրաստանի առաջին տիկին Սանդրա Էլիզաբեթ Ռուլովսին, որը Թբիլիսիի թիվ 1 հանրային դպրոցի տարրական դասարանում առողջ ապրելակերպի վերաբերյալ դաս էր անցկացնում: Ավելին, Netgazeti-ն հաղորդում է, որ անհայտ մի անձ ջնջել է տեսախցիկից Ռուլովսի հետ հարցազրույցը, որը նա տվել էր լրագրող Նինո Կախիշվիլիին:

«Սանդրա Էլիզաբեթ Ռուլովսը մեդիայի հետ զրուցել է առողջ ապրելակերպի կարևորության մասին դպրոցներում: Այլ հեռուստաընկերությունների հետ մեկտեղ Netgazeti-ն նույնպես նկարահանում էր Վրաստանի առաջին տիկնոջ հարցազրույցը, բայց կարճ ժամանակ անց անհայտ անձիք արգելել են նկարահանել Սանդրա Ռուլովսին խոշոր պլանով, այնուհետև ընդհանրապես արգելել են նկարահանումը», – հաղորդում է Նինո Կախիշվիլին:

Առաջին տիկնոջ ուղեկցողները որպես նկարահանման արգելման պաճառ բերել են այն փաստը, որ հրավիրվածների ցուցակում միայն հեռուստաալիքներ են: Սակայն մեկ օր առաջ՝ մարտի 14-ին, Netgazeti-ն Կրթության և գիտության նախարարությունից ստացել է միջոցառման անոնսը, գրում է լրագրողը:

Աղբյուր: Media.ge