Լուսանկարը կարող է փոխարինել հազարավոր բառերի, եթե այն ճիշտ է ընտրված: Վեբ-կայքում նկար տեղադրելուց առաջ պետք է հստակ իմանալ, թե ինչ ենթատեքստում է օգտագործվում տվյալ պատկերը: Օրինակ՝ եթե հոդվածն այնքան էլ լուրջ չէ, Դուք սահմանափակ չեք լուսանկարների ընտրության մեջ:

Նաև կարևոր է իմանալ, թե որտեղ է տեղադրվելու լուսանկարը. գլխավոր էջո՞ւմ, թե՞ հոդվածի մեջ: Եթե նկարը լինելու է գլխավոր էջում, ապա այն չպետք է պարունակի որևէ ավելորդ տարր. յուրաքանչյուր պիքսել պետք է օգտագործվի 100%-ով: Ձեր խնդիրն է գտնել այնպիսի լուսանկար, որը տեսնելով՝ ընթերցողը անմիջապես կցանկանա կարդալ հոդվածը: Եթե նկարը տեղադրվում է հոդվածի մեջ, համոզվեք, որ այն համապատասխանում է հոդվածի բովանդակությանը:

Կարևոր է նաև ստուգել լուսանկարի իսկությունը, որպեսզի հետագայում իրավաբանական խնդիրներ չառաջանան: Կան մեդիա ընկերություններ, որոնք ունեն իրենց լուսանկարիչները կամ ստանում են լուսանկարներ այլ գործակալություններից, որոնց հետ պայմանագիր ունեն: Սակայն եթե լուսանկար եք ստանում ընթերցողներից, պարտադիր պետք է ստուգել այն: Ոմանք լուսնկարներ են ուղարկում՝ իրենց անձնական շահերից ելնելով: Ուշադրություն դարձրեք, թե որտեղ է արված լուսանկարը: Օրինակ՝ եթե Ձեզ լուսանկարներ են ուղարկել որևէ մեծ միջոցառումից, մտածեք` հնարավո՞ր էր արդյոք միայնակ անել այդքան լուսանկար, թե՞ դրանք վերցված են մեկ այլ կայքից: 

Նաև կարևոր է պահպանել հեղինակային իրավունքները և էթիկայի կանոնները: 

Read More »Ի՞նչ լուսանկար տեղադրել վեբ-կայքում

Ինչպիսի՞ն պետք է լինի վեբ-կայքի տեքստը: Ինչպիսի՞ն է առցանց տեքստի կառուցվածքը: Քանի՞ բառ պետք է լինի հոդվածում: Ինչո՞ւ շրջել բուրգը:

Ինտերնետային կայքի համար գրված ակնարկը նույն բանը չէ, ինչ թերթի հոդվածը: Վեբ-ընթերցողը քմահաճ է. աչքի տակով անցկացնում է տեքստը իրեն հետաքրքրող տեղեկատվություն գտնելու ակնկալիքով, և եթե արագ արդյունքի չհասնի, ամենայն հավանականությամբ կլքի կայքը:

Այդ պատճառով տվե՛ք նրանց այն, ինչ ուզւոմ են:

Պատկերացրեք՝ ինչպես կպատմեիք Ձեր նորությունը մարդաշատ և աղմկոտ վայրում: Ինչի՞ց կսկսեիք: Շատ դեպքերում հենց այդպիսին պետք է լինի առցանց հոդվածի առաջին պարբերությունը:

Ընթերցողն առաջին հերթին ուշադրություն է դարձնում կայքում զետեղված վերնագրերին: Հաջողված վերնագիրը արտահայտում է այն, ինչի մասին խոսվելու է հոդվածում: Համոզվեք, որ Ձեր վերնագիրը լսարանին թյուրիմացության մեջ չի գցում:

Առցանց հոդվածները պետք է լինեն համեմատաբար կարճ, քանի որ  էկրանից ավելի բարդ է տեղեկատվությունն ընկալել քան թղթից: Որպես կանոն կարիք չկա մանրամասն նախապատմություն գրել, քանի որ կարելի է պարզապես հղում տալ Ձեր կայքում նախկինում հրապարակված նյութերի վրա:

Եթե Ձեր հոդվածը բաղկացած է մի քանի իմաստային մասից, կարող եք այն բաժանել հատվածների՝ վերնագրելով դրանցից յուրաքանչյուրը հեշտ ընկալելու համար:

Read More »Ինչպես գրել վեբ-կայքի համար