Վրաստանի Archives

Google-ը հրապարակել է Վրաստանի մանրամասն քարտեզը

11/10/2011

Google-ը աշխարհագրական տեղեկություններ է հրապարակել Վրաստանի մասին: Այսուհետ ցանկացած հետաքրքրված անձ կարող է մանրամասն տեղեկություններ գտնել Վրաստանի մասին Google Map-ում:

Արդարադատության նախարարության Հանրային ռեեստրի ազգային գործակալությունը Google ընկերության ղեկավարության հետ երկար ժամանակ բանակցություններ էր վարում:

Համաձայն նախարարության ներկայացուցչի՝ Հանրային ռեեստրը մեկուկես տարի աշխարհագրական և տարածքային տեղեկություններ է հավաքել Վրաստանի մասին Google-ին փոխանցելու համար:

Google-ի ադմինիստրատորին Վրաստանից ուղարկվել է երկրի մանրամասն քարտեզը, որտեղ նշված են ճանապարհները, լեռները, գագաթները, գետերը, ինչպես նաև տեսարժան վայրերն ու երկաթուղիները:

Google Map-ը զբոսաշրջիկներին կապահովի լիարժեք տեղեկատվությամբ տրանսպորտի և հյուրանոցային վայրերի մասին: Առցանց քարտեզի շնորհիվ մարդիկ հեշտությամբ կգտնեն փողոցները, կարևոր և հետաքրքիր վայրերը: Քարտեզի վրա նշված յուրաքանչյուր վայր ուղորդված է օգտակար տեղեկատվությամբ, աշխարհագրական կոորդինատներով և այլն:

Քարտեզի գործիքների շնորհիվ հնարավոր է չափել մի վայրից մյուսն ընկած հեռավորությունը, ինչպես նաև մոտեցնել և հեռացնել քարտեզը:

Աղբյուր: Media.ge

Ուկրաինայում Վրաստանի դեսպանատան աշխատակցի նկատմամբ քրեական գործ է հարուցվել

22/07/2011

Ուկրաինայում Վրաստանի դեսպանատան աշխատակցի նկատմամբ հարուցվել քրեական գործ լրագրողին ֆիզիկապես վիրավորելու համար: Ինչպես հաղորդում է «Comments» վեբ-պորտալը, տուժողը լրագրող Ալեքսանդր Յամկովոյն է:

Քրեական գործը հարուցվել է խուլիգանության մեղադրանքով Կիևի ոտիկանության կողմից: Մեղադրյալին սպասվում է մինչև 7 տարի ազատազրկում:

Տուժած լրագրողը պատրաստվում է մեկ այլ գործ հարուցել ՔՕ 171 հոդվածի համաձայն՝ լրագրողական գործունեությանը խոչնդոտելու համար:

InerPressNews-ը պարզել է, որ լրագրողի վրա հարձակում գործած աշխատակիցը Թեմուր Զարնաձեն է:

Աղբյուր: Media.ge

Վրաստանի Ներքին գործերի նախարարությունը բավարարում է լրագրողի բողոքը

30/06/2011

Հունիսի 27-ին Վրաստանի Ներքին գործերի նախարարությունը բավարարեց «Օբյեկտիվի» մեդիա միավորման լրագրող Նինո Մակիաշվիլու բողոքը և համաձայնեց նրան տրամադրել պահանջված տեղեկատվությունը: Այս մասին հաղորդում է Վրաստանի երիտասարդ փաստաբանների ասոցիացիան, որն աջակցություն էր ցույց տալիս լրագրողին:

Մայիսի 27-ին Նինո Մակիաշվիլին Ներքին գործերի նախարարությանը դիմում էր ներկայացրել՝ պահանջելով հայտնել, թե որ ոստիկանական ստորաբաժանումներն են իրականացրել մայիսի 26-ի բողոքի ցույցի ցրումը: Նախարարությունը ոչ մի կերպ չէր արձագանքել: Լրագրողը դիմում էր ներկայացրել նախարարին: Հունիսի 27-ին տեղի ունեցած բանավոր լսումների ժամանակ նախարարության ներկայացուցիչը հայտնել է, որ լրագրողը շուտով կստանա իրեն հետաքրքրող տվյալները:

Աղբյուր: Media.ge

Վրաստանի հանրային հեռուստատեսության հայտարարությունը ցույցի վերաբերյալ

24/05/2011

Հանրային հեռուստատեսությունը արձագանքում է իր շենքի դիմաց սկսված բողոքի ցույցին և հայտարարում, որ չնայած այն բոլոր մեղադրանքներին, թե հանրային հեռուստատեսությունը կողմնակալ է՝ հեռուստաալիքը չի դառնա որևէ քաղաքական խմբավորման գործիք, և ավելին՝ չկա այդ մեղադրանքների համար հիմք հանդիսացող որևէ ապացույց:

Հանրային հեռուստատեսությունը հնարավորություն է տալիս ընդդիմության ներկայացուցիչներին մասնակցել և իրենց կարծիքը հայտնել քաղաքական 5 թոք-շոուների ժամանակ, որոնք հեռարձակվում են Առաջին ալիքով: Հեռուստաալիքի լրատվական թողարկումների ընթացքում ցուցադրվում են հատվածներ բողոքի ակցիայից, իսկ Երկրորդ ալիքը ուղիղ եթերում հեռարձակում է ցույցն առանց մեկնաբանությունների:

Հանրային հեռուստատեսությունը պատրաստում և հասարակությանն է ներկայացնում բարձրորակ հեռուստատեսային և ռադիո հաղորդումներ, որոնք չեն պարունակում որևէ քաղաքական ազդեցություն: Մեր գլխավոր սկզբունքները՝ անկախությունը, անկողմնակալությունը և ազնվությունը, չեն կարող կասկածի տակ դրվել որևէ քաղաքական ուժի կողմից:

Աղբյուր: Media.ge

Վրաստանի առաջին նախագահի այրին պնդում է, որ Myvideo.ge կայքը կիրառում է ցենզուրա

11/04/201114/02/2022

Վրաստանի առաջին նախագահի այրի Մանանա Արչվաձե-Գամսախուրդիան մեղադրում է վրացական www.myvideo.ge պորտալին տեսաքննադատություն կիրառելու մեջ: Ենթադրվում է, որ կայքի ադմինիստրացիան հեռացրել է մարտի 30-ին կայք վերբեռնված տեսանյութը: Այն նվիրված էր Վրաստանում 20 տարի առաջ տեղի ունեցած իրադարձություններին:

YouTube-ում տեղադրված իր ուղերձում Մանանա Արչվաձե-Գամսախուրդիան պնդում է, որ տեսանյութը, որն արգելափակել է վրացական կայքի ադմինիստրացիան, հատուկ պատրաստված էր Վրաստանի անկախության 20-ամյակի և Վրաստանի առաջին նախագահի ծննդյան տարեդարձի առթիվ:

Այդ տեսանյութում Մանանա Արչվաձեն պատմում է անկախությանը նախորդող գործընթացների, 1991 թ-ի մարտի 31-ի հանրաքվեի հետևանքների և Զվիադ Գամսախուրդիայի կենսագրության մասին:

Գամսախուրդիայի այրին կասկածներ ունի, որ կայքի ադմինիստրացիան ղեկավարվում է իշխանությունների կողմից:

«Տեսանյութը արգելափակվել է այն վերբեռնելուց 24 ժամվա ընթացքում, չնայած, որ այն ոչ մի վիրավորական կամ չթույլատրված նյութ չէր պարունակում», – ասել է Մանանա Արչվաձեն՝ պահանջելով տեսանյութի վերականգնում և գրավոր պատասխան կայքի ադմինիստրացիայից:

Myvideo.ge կայքի սեփականատեր ITDC ընկերությունը հայտնում է, որ նրանք չեն հասկանում Մանանա Արչվաձեի բողոքի հիմքերը:

Վրաստանի երիտասարդները ցույց են կազմակերպում ցածրորակ հեռուստատեսության դեմ

28/03/201114/02/2022

Թբիլիսիի կենտրոնում երիտասարդների 30 հոգանոց մի խումբ բողոքի ակցիա էր կազմակերպել ցածրորակ հեռուստատեսային շուների դեմ:

Ցույցի կազմակերպիչները Շոթա Ռուսթավելու արձանի մոտ տեղադրել էին հեռուստացույցի խրտվիլակ, որի էկրանի վրա պատկերված էր ճառագայթման խորհրդանիշ: Թղթի վրա յուրաքանչյուր ոք հնարավորություն ուներ գրելու իր չսիրած հաղորդման անվանումը և տեղադրելու այն «հեռուստացույցի» մեջ:

Ըստ կազմակերպիչների՝ Վրաստանի հեռուստաեթերը ողողված է ցածրորակ հաղորդումներով, որոնք փչացնում են հեռուստադիտողների ուղեղն ու մտածելակերպը: Ակցիայի կարգախոսն էր «Մի կեղտոտեք մեզ»: Ակցիայի շրջանակներում մասնակիցները շորի կտորտանքներ լվացին՝ պատկերելով մարդու ուղեղը:

Մտահաղացման հեղինակները Facebook-ի անդամներ են: Նպատակը արտասովոր ճանապարհով վրացական հեռուստատեսության ցածրորակ հաղորդումների դեմ բողոքի արտահայտումն էր` կոչ անելով ստեղծել հեռուստատեսային ծրագրեր հիմնված մարդկանց իրավունքների վրա:

Աղբյուր: Media.ge

Netgazeti կայքի լրագրողին արգելել են նկարահանել Վրաստանի առաջին տիկնոջը

17/03/201114/02/2022

Մարտի 15-ին Netgzeti առցանց պարբերականի լրագրող Նինո Կախիշվիլիին արգելել են նկարահանել Վրաստանի առաջին տիկին Սանդրա Էլիզաբեթ Ռուլովսին, որը Թբիլիսիի թիվ 1 հանրային դպրոցի տարրական դասարանում առողջ ապրելակերպի վերաբերյալ դաս էր անցկացնում: Ավելին, Netgazeti-ն հաղորդում է, որ անհայտ մի անձ ջնջել է տեսախցիկից Ռուլովսի հետ հարցազրույցը, որը նա տվել էր լրագրող Նինո Կախիշվիլիին:

«Սանդրա Էլիզաբեթ Ռուլովսը մեդիայի հետ զրուցել է առողջ ապրելակերպի կարևորության մասին դպրոցներում: Այլ հեռուստաընկերությունների հետ մեկտեղ Netgazeti-ն նույնպես նկարահանում էր Վրաստանի առաջին տիկնոջ հարցազրույցը, բայց կարճ ժամանակ անց անհայտ անձիք արգելել են նկարահանել Սանդրա Ռուլովսին խոշոր պլանով, այնուհետև ընդհանրապես արգելել են նկարահանումը», – հաղորդում է Նինո Կախիշվիլին:

Առաջին տիկնոջ ուղեկցողները որպես նկարահանման արգելման պաճառ բերել են այն փաստը, որ հրավիրվածների ցուցակում միայն հեռուստաալիքներ են: Սակայն մեկ օր առաջ՝ մարտի 14-ին, Netgazeti-ն Կրթության և գիտության նախարարությունից ստացել է միջոցառման անոնսը, գրում է լրագրողը:

Աղբյուր: Media.ge