է Archives - Page 4 of 6

Իրանցի ակտիվիստը մահանում է հոր թաղման ժամանակ

02/06/2011

Ենթադրվում է, որ ընդդիմադիր ակտիվիստ Հալեհ Սահաբիի մահվան պատճառը անվտանգության ծառայության աշխատակիցների միջամտությունն է իր հոր թաղման արարողության ժամանակ:

Հալեհ Սահաբիին ազատել էին բանտից, որպեսզի նա մասնակցի հոր՝ Էզաթոլահ Սահաբիի թաղման արարողությանը: Հայրը նույնպես ականավոր քաղաքական գործիչ էր:

Արարողությանը ներկա գտնվող լրագրողներից մեկը հայտնել է, որ քաղքացիական հագուստով մարդկանց և անվտանգության ծառայության աշխատակիցների մի մեծ խումբ ներխուժել է թաղման արարողության վայրը և ծեծի ենթարկել սգացողներին:

Հալեհ Սահաբին, ում ձեռքին եղել է հոր նկարը, նույնպես ծեծի է ենթարկվել, երբ նրա ձեռքից փորձել են խլել նկարը՝ հայտնում է լրագրողը: Այնուհետև նա փորձել է մոտենալ հոր մարմնին, սակայն նրան մի կողմ են քաշել և հարվածել:

Այդ պահին Հալեհ Սահաբին սրտի կաթված է ստացել: Նրան տեղափոխել են Թեհրանի հիվանդանոցներից մեկը, սակայն նրա կյանքը փրկել չի հաջողվել:

Աղբյուր: http://www.news.az/

Amnesty International կազմակերպությունը հատուկ մրցանակ է շնորհել Ֆաթուլաևին

31/05/2011

«Մայիսի 28-ին Amnesty International կազմակերպությունը Էյնուլա Ֆաթուլաևին հատուկ մրցանակ է շնորհել լուռ հերոսության համար: Ֆաթուլաևին ծեծել են, սպառնացել մահով և վերջապես բանտ նետել: Դրամատիկ կերպով նրան ազատեցին անցյալ շաբաթ: Այս ազատումը նա վերագրում է Amnesty-ի ջանքերին:

Amnesty-ի պատմությունը հիշեցնում է մեզ, որ խոսքի ազատության համար պետք է պայքարեն և հաղթեն բոլոր սերունդները», – գրում է բրիտանական Guardian-ը:

Source: http://times.am

ԵԱՀԿ. Ադրբեջանը մամուլի ասպարեզում առաջընթաց է գրանցում

16/05/2011

Մամուլի ազատության ԵԱՀԿ ներկայացուցիչ Դունյա Միյատովիչը համոզված է, որ վերջին մեկուկես տարվա ընթացքում ադրբեջանական մամուլում դրական փոփոխություններ են տեղի ունեցել:

«Վերջին մեկուկես տարվա ընթացքում Ադրբեջանի մամուլում դրական փոփոխություններ են նկատվում: Սակայն գլխավոր աշխատանքները կսկսվեն այն ժամանակ, երբ երկրում ընդունվի զրպարտության մասին օրենքը», – իր քառօրյա այցի ամփոփման ժամանակ հայտնել է Միյատովիչը:

«Ես ողջունում եմ նախագահ Իլհամ Ալիևի հայացքները համացանցի ազատության վերաբերյալ», – ասել է Միյատովիչը:

Այցի ընթացքում Միյատովիչը հանդիպել է իշխանությունների և ադրբեջանական մամուլի ներկայացուցիչների հետ:

Ապագայում ևս Միյատովիչը պատրաստվում է հետևել Ադրբեջանում տեղի ունեցող գործընթացներին:

«Զրպարտանքի մասին օրենքի կարևորագույն նպատակն է խուսափել լրագրողների ազատազրկումներից, ինչպես նաև թեթևացնել այն գումարների չափերը, որոնք մամուլը վճարում է որպես տուգանք», – ասում է Միյատովիչը:

«Ես ակնկալում եմ, որ Ադրբեջանի խորհրդարանը քննարկում կծավալի օրինագծի վերաբերյալ և հասարկությունը կաջակցի այդ օրինագծին», – ասել է նա:

Զրպարտանքի մասին օրինագիծը մշակվել է ԵԱՀԿ Բաքվի գրասենյակի օգնությամբ 2005 թվականին: Օրինագծի մշակմանը մասնակցել են պատգամավորներ, մամուլի ներկայացուցիչներ և փաստաբաններ:

Եվրախորհրդարանը խիստ բանաձև է ընդունում Ադրբեջանի վերաբերյալ

16/05/2011

Եվրոպական խորհրդարանը պատրաստվում է խիստ բանաձև ընդունել Ադրբեջանում մարդու իրավունքների վերաբերյալ: Այս մասին հայտնում է Թուրան լրատվական գործակալությունը:

Բանաձևը վերաբերում է մարդու իրավունքների և ժողովրդավարության զարգացմանը Ադրբեջանում՝ ներառյալ Էյնուլլա Ֆաթուլլաևի և ակտիվիստ Ջաբար Սավալանի, ինչպես նաև այլոց գործերին:

Աղբյուր: News.am

ԵԱՀԿ պաշտոնյան հանդիպել է ազատազրկված ադրբեջանցի լրագրողի հետ

11/05/201114/02/2022

ԵԱՀԿ-ի մամուլի ազատության ներկայացուցիչ Դունյա Միյատովիչը հանդիպել է ադրբեջանցի լրագրող Էյնուլլա Ֆաթուլաևի հետ, որը գտնվում է բանտում ապօրինի թմրամիջոցներ պահելու համար, հայտնում է ադրբեջանական “Ազատություն” ռադիոկայանը:

Դունյա Միյատովիչի այցը տեղի է ունեցել մայիսի 10-ին՝ զրպարտանքի ապաքրեականացման վերաբերյալ կոնֆերանսից մեկ օր առաջ:

Ադրբեջանը Հարավային Կովկասի միակ երկիրն է, որտեղ զրպարտանքը քրեորեն պատժելի հանցագործություն է: Մամուլի և մարդու իրավապաշտպանները բազմիցս կոչ են արել հանելու զրպարտանքի մասին հոդվածը քրեական օրենսգրքից:

Աղբյուր: RFE/RL

«Լրագրողներ առանց սահմանների»-ն մտահոգ է Հայաստանում մամուլի վիճակով

05/05/2011

Ֆրանսիական «Լրագրողներ առանց սահմանների» կազմակերպությունը մտահոգված է հայկական թերթերի նկատմամբ հարուցված դատական գործընթացներով և սահմանված վնասների փոխհատուցման գումարներով, որոնք սպառնում են թերթերի գոյությանը և ստիպում դրանց զբաղվել ինքնագրաքննությամբ:

2010-ի ապրիլին տեղի ունեցած փոփոխությունը, ըստ որի ապաքրեականացվեց զրպարտանքի և վիրավորանքի մասին օրենքը, դիտվեց որպես ժողովրդավարական քայլ, սակայն դատական հետապնդումները մամուլի նկատմամբ շարունակվում են: Միայն 2011-ի առաջին եռամսյակում հարուցվել է զրպարտության 12 գործ: Գլխավոր թիրախն անկախ թերթերն են: Ներկայումս «Ժամանակ» օրաթերթի դեմ ներկայացված է երեք տարբեր հայց: Դատական գործ է հարուցված նաև «Հայկական ժամանակ»-ի և «Հրապարակ»-ի նկատմամբ:

Հիմնականում հայցվորները քաղաքական գործիչներ են: Ապրիլի 18-ին ՀՀ Վերաքննիչ դատարանը «Հետք» կայքին, որը ստեղծել է «Հետաքննող լրագրողներ» ՀԿ-ն, պարտադրել է որպես փոխհատուցում Իջևանի քաղաքապետին վճարել 450 000 դրամ, ինչպես նաև հերքել տպագրված նյութը: Սպառելով բոլոր հույսերը՝ ՀԿ-ն ցանկանում է դիմել Մարդու իրավունքների եվրոպական դատարան:

15 տարով ազատազրկված լրագրող Էռնեստ Վարդանյանին ներում են շնորհել

05/05/2011

Չճանաչված Մերձդնեստրի մոլդովական հանրապետության նախագահ Իգոր Սմիրնովն այսօր մի շարք ԶԼՄ ներկայացուցիչների հետ հանդիպման ժամանակ հայտնել է, որ Մամուլի օրվա կապակցությամբ նա ներում է շնորհում Էռնեստ Վարդանյանին:

30-ամյա Էռնեստ Վարդանյանի նկատմամբ, ով մոլդովական RIA “New Region”-ի լրագրող-վերլուծաբանն է, 2010 թվականի դեկտեմբերի 16-ին Մերձդնեստրյան մոլդովական հանրապետության Գերագույն դատարանի կողմից դատապարտվել էր 15 տարվա ազատազրկման` լրտեսության ու պետական դավաճանության համար:

Ինչպես նախկինում հայտնել է «Օլվիա-պրես» մերձդնեստրյան պաշտոնական լրատվական գործակալությունը՝ 2010 թվականի ապրիլին Մերձդնեստրի հանրապետության ազգային անվտանգության նախարարությունը ձերբակալել է Էռնեստ Վարդանյանին համաձայն ՔՕ 271-րդ հոդվածի՝ լրտեսության ու պետական դավաճանության մեղադրանքով՝ Մոլդովայի հանրապետության հատուկ ծառայությունների հետ համագործակցելու համար: Ըստ «Օլվիա-պրես»-ի, դատական լսումների ժամանակ Էռնեստ Վարդանյանը զղջացել էր իր արարքի համար և պատմել, թե ինչպես են անվտանգության ծառայության աշխատակիցներն իրեն ստիպել համագործակցել:

Լրագրողներ առանց սահմանների. Իրանը «գիշատիչ» է մամուլի ազատության համար

04/05/201114/02/2022

Փարիզյան «Լրագրողներ առանց սահմանների» կազմակերպությունը աշխարհի տարբեր քաղաքական առաջնորդների, հանցավոր խմբավորումների և ապստամբների իր ամենամյա ցուցակում, որպես մամուլի ազատության հանդեպ «գիշատչի», ընդգրկել է նաև Իրանին:

Ըստ կազմակերպության, Իրանի նման կարգավիճակի գլխավոր մեղավորը երկրի գերագույն առաջնորդ Ալի Խամենեին է, ով «պատասխանատու է լրագրողների նկատմամբ շարունակական բնույթ կրող ճնշումների համար: Միջազգային մամուլի դեմ հնչեցրած նրա վարակիչ և բորբոքիչ քննադատություններն արթնացրել են կառավարող մարմինների զայրույթը լրատվամիջոցների հանդեպ: Նա լիովին համաձայնել է այն դատական համակարգի հետ, որը 2009-ի օգոստոսին և 2010-ի հունվարին իրականացրեց մի շարք ցուցադրական դատավարություններ՝ լրագրողներին և բլոգերներին անհավանական երկար ժամկետներով ազատազրկելով և որոշ դեպքերում նույնիսկ մահապատժի ենթարկելով: Հեղափոխական պահակախումբը, որն անուղղակիորեն ենթարկվում է Խամենեին, կառավարում է Թեհրանում գտնվող Էվին բանտը, հետևաբար հենց նա է պատասխանատու այդ բանտում լրագրողներին և բլոգերներին տանջելու և այլ ոտնձգությունների համար»:

Կազմակերպությունը Խամենեին մեղադրում է նաև «մարդկության դեմ հանցանքներ կատարելու մեջ»՝ ավելացնելով, որ նախագահ Ահմադինեջադն էլ «ուղղակիորեն պատասխանատու է այս ճնշման համար, որը նա կազմակերպում է կրթության, մշակույթի նախարարների հետ՝ իսլամական և հեղափոխական պահակախմբի աջակցությամբ»:

Նիկոլ Փաշինյանն առաջադրվել է Հրանտ Դինքի անվան մրցանակի

29/04/201114/02/2022

Ըստ epress.am-ի՝ «Հայկական ժամանակ» օրաթերթի գլխավոր խմբագիր, քաղբանտարկյալ Նիկոլ Փաշինյանն առաջադրվել է Հրանտ Դինքի անվան մրցանակի:

Համաձայն «Հրանտ Դինք» հիմնադրամի` մրցանակը տրվում է «խտրականությունից, ցեղասպանությունից, բռնությունից զերծ, ազատ ու անկախ աշխարհի ձգտող, այդ ուխտի համար անհատական զոհողություններ ցուցաբերող, կանխակարծիքներ խորտակող, այդ պայքարի մեջ հասարակությանը խրախուսող անձանց»:

2009 թվականին Հրանտ Դինքի անվան միջազգային մրցանակը ստացել է իսրայելցի լրագրող, հրապարակախոս, Ամիրա Հասը, իսկ 2010 թվականին իսպանացի դատավոր Բալտասար Գարսոն Ռեալը:

Նիկոլ Փաշինյանին որպես Հրանտ Դինքի անվան մրցանակի թեկնածու է առաջադրել «Անկախ լրագրողների ցանց» հասարակական կազմակերպությունը:

Ֆուտբոլային հարված. լեգենդար ֆուտբոլիստ – մարզիչը ծեծել է լրագրողին

26/04/201114/02/2022

Ինչպես տեղեկացնում է Totalfootball.am կայքը՝ Totalfootall.am-ի ֆոտոլրագրող Աշոտ Առուշանյանն ապրիլի 23-ին կայացած Հայաստանի ֆուտբոլի առաջնության վեցերորդ տուրի «Արարատ» – «Փյունիկ» հանդիպման ընդմիջմանը (1:4 (0:2)) ծեծի է ենթարկվել Երևանի «Արարատի» գլխավոր մարզիչ Արկադի Անդրեասյանի և նրան ուղեկցող անձանց կողմից, այն բանից հետո, երբ կատարում էր իր աշխատանքը և լուսանկարում էր տրիբունայում գտնվող մասնագետին: Առաջին հարվածը հասցրել է հենց Անդրեասյանը, ապա նրան ուղեկցողները դաժանորեն ծեծել են Առուշանյանին «Հրազդան» մարզադաշտի թունելում:

19-ամյա ֆոտոլրագրողը ծնոտի վնասվածքի և գլխացավերի պատճառով երեկոյան շտապօգնության մեքենայով տեղափոխվել է հիվանդանոց, սակայն հաջորդ օրը առավոտյան դուրս է գրվել հիվանդանոցից: Հետազոտությունները ցույց են տվել, որ լրագրողի մոտ դեմքի հատվածում առկա են մկանային վնասվածքներ, իսկ ոսկրային կոտրվածքներ չկան: Ծնոտի ցավերի պատճառով 19-ամյա ֆոտոլրագրողը դեռևս դժվարանում է ուտել և խմել, հայտնում է Totalfootball.am-ը:

Ըստ կայքի դեռևս չճշտված տվյալների՝ այս միջադեպի հետ կապված Արկադի Անդրեասյանն առնվազն մինչև կեսգիշեր (այսինքն՝ առնվազն վեց ժամ) գտնվել է ոստիկանական բաժանմունքում, որտեղ հարցաքննության է ենթարկվել: