«ԳԱԼԱ» Archives

Ժամանակավոր եթերազրկում. «ԳԱԼԱ»-ն աշտարակից ապամոնտաժեց սարքավորումները (լրացված)

25/10/2011

Հոկտեմբերի 25-ին, Վճռաբեկ դատարանի որոշման համաձայն, Գյումրու քաղաքապետարանին պատկանող հեռուստաաշտարակից ապամոնտաժվեցին «ԳԱԼԱ» հեռուստաընկերությանը պատկանող սարքավորումները:

Դրանք տեղափոխվեցին Գյումրու կենտրոնական հեռուստաաշտարակ, որը պատկանում է ՀՀ տրասպորտի և կապի նախարարությանը կից Հայաստանի հեռուստատեսային և ռադիո հաղորդիչ ցանց ՓԲԸ-ին: Ապամոնտաժման պահից սկսած «ԳԱԼԱ»-ի հեռուստաեթերը դադարեցվեց, սակայն հեռուստաընկերության տնօրինությունը հայտնում է, որ այն կվերականգնվի մի քանի ժամվա ընթացքում, եթե մոնտաժային աշխատանքների ժամանակ լրացուցիչ դժվարություններ չառաջանան:

«Երկու ամիս առաջ ԴԱՀԿ-ից (Դատական ակտերի հարկադիր կատարման ծառայություն) նամակ ստացանք, հետաքրքրվում էին` ինչ փուլում է ապամոնտաժման պրոցեսը: Պատասխանել ենք, որ կան տեխնիկական խնդիրներ, որպեսզի մեր ազդանշանը հասցնենք մյուս հեռուստաաշտարակ, իսկ համապատասխան մասնագետներ գտնելու համար մեզ ժամանակ էր անհրաժեշտ»,- ասում է «ԳԱԼԱ»-ի սեփականատեր Վահան Խաչատրյանը:

Ապամոնտաժման օրը ևս «ԳԱԼԱ»-ն ԴԱՀԿ-ից նամակ ստացավ, սակայն ալևս չպատասխանեց, քանի որ ապամոնտաժման աշխատանքներն ավարտված էին:

Առայժմ պարզ չէ, թե սարքավորումները Գյումրիի կենտրոնական հեռուստաաշտարակ տեղափոխելու արդյունքում ինչպիսին կլինի «ԳԱԼԱ»-ի հեռուստաեթերի որակը:

Ժուռնալիստների «դեֆիցիտ» Գյումրիում

23/09/2011

Տևական ժամանակ է` Գյումրու գրեթե բոլոր լրատվամիջոցները հայտարարություններ են տալիս լրագրողների թափուր աշխատատեղերը համալրելու նպատակով, սակայն գործատուները դժգոհում են, որ ոչ մի կերպ չի հաջողվում գտնել համապատասխան կադրեր: Չեն փրկում նաև խմբագրությունների կողմից կազմակերպվող կարճաժակետ մասնագիտական դասընթացները:

Բանը հասել է նրան, որ հանրապետության առաջին մասնավոր հեռուստաընկերությունը` «ՑԱՅԳ»-ը, անցած շաբաթ կադրեր էր փնտրում Գյումրիում կազմակերպված աշխատանքի տոնավաճառում:

Քաղաքում 10-ից ավելի լրատվամիջոց է գործում: Դրանցից են «ԳԱԼԱ» հեռուստաընկերությունը, «Շանթ» հեռուստաընկերությունն ու նույնանուն ռադիոն, «ՑԱՅԳ» հեռուստաընկերությունն ու «Ռադիոհայ Գյումրի» ռադիոն, «Շիրակ» հանրային հեռուստատեսությունն ու «Շիրակի ձայն» ռադիոկայանը, «Շրջապատ», «Հինգշաբթի» և «Կումայրի» շաբաթաթերթերը և «Շիրակ» երկշաբաթաթերթը:

Ո՞րն է խիստ ժամանակակից այս մասնագիտության «արհարմարհված» լինելու պատճառը Գյումրիում. ցածր վարձատրությո՞ւ նը, բուհերի կողմից աշխատաշուկային համապատասխան կադրեր չպատրաստե՞լը, թե՞ կան նաև այլ պատճառներ:

«ՑԱՅԳ» հեռուսաընկերության գործադիր տնօրեն Մարգարիտա Մինասյանը դժգոհում է, որ իրենց են դիմում «նստած ժուռնալիստ» աշխատելու առաջարկով: «Չեն պատկերացնում, որ սա ակտիվ աշխատանք է»,- ասում է Մինասյանը` համարելով, որ ժուռնալիստիկայի ֆակուլտետն ավարտելը դեռ չի նշանակում գործից գլուխ հանել:

«ԳԱԼԱ» լուր. Գյումրու քաղաքապետարանը պատրաստ է տարածք տրամադրել հեռուստաաշտարակի վրա

25/07/2011

Մոտ 4 տարվա դատական քաշքշուքները Գյումրու քաղաքապետարանի և «ԳԱԼԱ» ՀԸ սեփականատեր «Չապ» ընկերության միջև թևակոխում են մեկ այլ փուլ:

Հուլիսի 15-ին Գյումրու քաղաքապետարանը, Վճռաբեկ դատարանի մեկ ամսվա վաղեմության որոշումն ունենալով, որով մերժվել է «ԳԱԼԱ» հեռուստաընկերության բողոքը` ուժի մեջ թողնելով վերաքննիչ դատարանի որոշումը, շտապեց դատական ակտերի հարկադիր կատարման ծառայություն (ԴԱՀԿ):

Այսպիսով քաղաքի իշխանությունները հույս ունեն ԴԱՀԿ-ի միջոցով ազդել «ԳԱԼԱ» հեռուստաընկերության վրա, որպեսզի վերջինս քաղաքի հին հեռուստաաշտարակից ապամոնտաժի իրեն պատկանող հեռարձակող սարքավորումները:

Հեռուստաընկերության ղեկավարության կարծիքով` Վճռաբեկ դատարանի որոշումը նպատակաուղղված է «ԳԱԼԱ»-ին հանրապետական ընտրությունների լուսաբանումից զրկելուն: «Ես չէի ուզի էդպես մտածել, բայց որ երեք ու կես տարի է` քնած գործը ընտրությունների նախաշեմին այսպես ասած արթնանում է և սկսվում է քննվել, և կայացվում է էնպիսի վճիռ, որ մենք պետք է սարքավորումները ապամոնտաժենք, և հավելյալ սարքավորումների ձեռք բերման պահանջ է առաջանում, այդպիսի կասկած ունեմ, որ մեզ զրկում են ընտրությունները լուսաբանելուց»,- ասում է «ԳԱԼԱ»-ի սեփականատեր Վահան Խաչատրյանը:

Հեռուստաաշտարակը քաղաքապետարանի կողմից սեփականաշնորհվել է 2007 թ-ին: Մինչ այդ աշտարակը անտեր էր և ազատ օգտագործվում էր «Չապ» ՍՊ ընկերության կողմից:

Lրագրողական կազմակերպությունների հայտարարությունը Գալա ՀԸ վերաբերյալ

19/07/2011

2011թ. հուլիսի 15-ին Գյումրիի քաղաքապետարանը դիմել է դատական ակտերի հարկադիր կատարման ծառայություն՝ «ԳԱԼԱ» հեռուստաընկերության նկատմամբ իր պահանջն իրականացնելու համար, այն է՝ քաղաքի հին հեռուստաաշտարակից ապամոնտաժել «ԳԱԼԱ»-ի հեռարձակող սարքավորումները:

Դատարանի որոշման վերաբերյալ լրագրողական կազմակերպությունների հայտարարությանը կարող եք ծանոթանալ այստեղ:

Video. մարտի 25` խոսքի ազատության օրը Գյումրիում

26/03/201114/02/2022

Արդեն երրորդ անգամ Ժուռնալիստների «Ասպարեզ» ակումբի նախաձեռնությամբ մարտի 25-ին Գյումրիում նշվում է Խոսքի ազատության օրը: Դեռ 2008 թ-ին այս օրը հեռուստամարաթոնի արդյունքում հաջողվեց հավաքել մոտ 26 միլիոն դրամ հօգուտ Գյումրիի «ԳԱԼԱ» հեռուստաընկերության:

Նման հեռուստամարաթոնի անհրաժեշտություն առաջացավ այն բանից հետո, երբ «ԳԱԼԱ»-ն ընդդիմության հանրահավաքները լուսաբանելուց հետո հայտնվեց իշխանությունների աննախադեպ ճնշման տակ` հարկային մարմինների սահմանած տույժերի ու տուգանքների ձևով: «Ասպարեզ» ակումբի և «ԳԱԼԱ»-ի համատեղ ջանքերով անցկացված հնգօրյա համաժողովրդական հանգանակության շնորհիվ հեռուստաընկերությունը կարողացավ վճարել տուգանքները` փրկվելով եթերազրկման սպառնալիքից:

Այս տարվա հանդիսության ընթացքում պարգևատրվեցին իրենց աշխատանքով աչքի ընկած 4 լրագրողներ.

Գյումրվա փակուղին. «ԳԱԼԱ»-ն զրկվեց նաև աշտարակից օգտվելու իրավունքից

18/02/201114/02/2022

«ԳԱԼԱ» հեռուստաընկերության հեռարձակումը կարող է դադարեցվել զուտ այն պատճառով, որ հեռուստաընկերությանը պատկանող հեռարձակող ալեհավաքը դատարանի որոշմամբ պետք է մեկ ամսվա ընթացքում ապամոնտաժվի հեռուստաաշտարակի վրայից:

Փետրվարի 17-ին նման որոշում ընդունեց Շիրակի մարզի ընդհանուր իրավասության դատարանը` այսպիսով վերջակետ դնելով երկու տարի ձգձգվող Գյումրու քաղաքապետարանն ընդդեմ «ԳԱԼԱ» ՀԸ սեփականատեր «Չապ» ՍՊԸ-ի և «Չապ» ՍՊԸ-ն ընդդեմ քաղաքապետարանի միացյալ գործերով դատաքննությանը:

Վեճի առարկան հեռուստաաշտարակն էր, որը գտնվում է Գյումրու Վազգեն Սարգսյան 6/1 հասցեում: Այն երկար ժամանակ անտեր էր, սակայն 2007 թ-ին սեփականաշնորհվեց Գյումրու քաղաքապետարանի կողմից, որն էլ պահանջեց ազատել հեռուստաաշտարակը «ԳԱԼԱ»-ին պատկանող սարքավորումներից:

Երկու տարի շարունակ երկարատև ընդմիջումներով գործը լսելուց հետո դատավոր Շիրակ Հակոբյանը ընթերցեց վճիռը` բավարարելով միայն Գյումրու քաղաքապետարանի պահանջը: «Հարկադրել հեռուստաընկերությանը մեկամսյա ժամկետում Վ.Սարգսյան 6/1 հասցեում գտնվող հեռուստաաշտարակի վրայից ապամոնտաժել «Չապ» ՍՊԸ ընկերությանը պատկանող հաղորդակի մաս հանդիսացող, հեռուստաաշտարակի գագաթնային հատվածում տեղադրված հաղորդիչ ալեսփյուռը (անտենան) և մալուխը», նշվում է դատավորի վճռի մեջ:

Մտահոգություններ Գյումրիից. «ԳԱԼԱ»-ն եթերում կմնա մինչև 2015 թվականը, իսկ հետո…

24/12/201012/02/2022

Հեռուստատեսության և ռադիոյի ազգային հանձնաժողովի դեկտեմբերի 23-ի որոշմամբ, 2015 թ.-ից սկսած Շիրակի մարզը կունենա ընդամենը մեկ հեռուստաընկերություն` «Ցայգ»-ը, իսկ «ԳԱԼԱ»-ն` կեթերազրկվի, ինչպես հանրապետությունում առկա անալոգային հեռարձակմամբ մյուս հեռուստաընկերությունները:

«ԳԱԼԱ»-ի սեփականատեր Վահան Խաչատրյանը, արձագանքելով ՀՌԱՀ-ի որոշմանը, այն համարեց շոու, ՀՌԱՀ-ի նախագահ Գրիգոր Ամալյանին էլ` գլխավոր շոումեն:

Նրա համոզմամբ, «ԳԱԼԱ»-ի նկատմամբ քաղաքական որոշում է կայացվել, որը հայտնի էր ի սկզբանե: «ԳԱԼԱ»-ի սեփականատերը մտադրություն ունի դատարանի միջոցով վերականգնել արդարությունը:

«Ես խորհրդակցել եմ մեր փաստաբանի հետ, մենք նախատեսել ենք դա, մեր փաստաբանը հիմա զբաղված է այդ գործերով, և եթե ինքը գտնի, որ կարելի է ինչ-որ բան անել, դատի կտանք: Խնդիրն այն է, որ մենք խորը կասկածներ ունենք, որ մրցույթին մասնակցող մյուս հեռուստաընկերության ծրագիրը կարող է փոփոխված լինել, այսինքն այն չլինի, ինչ որ իրենք ներկայացրել են մրցույթին: Եթե պարզվի, որ դա այդպես է, ուրեմն հարցը իրավական հարթություն կտեղափոխենք»:

Գյումրեցի լրագրող Համլետ Մոսինյանը, ով բացասական կարծիք ունի ՀՌԱՀ-ի գործունեության վերաբերյալ, արդար լուծումներ չէր ակնկալում նրանցից: