Հայերեն բովանդակությունը համացանցում վերջին մեկ տարվա ընթացքում զգալիորեն ավելացել է, և այս ուղղությամբ բավական աշխատանք է արվել:

Ինֆորմացիոն Տեխնոլոգիաների Ձեռնարկությունների Միության գործադիր տնօրեն Կարեն Վարդանյանի խոսքով` մեկ տարի առաջ համացանցում հայերեն բովանդակություն գրեթե չկար, իսկ այժմ ստեղծվել են տարբեր թեմաներով բազմաթիվ հայալեզու կայքեր և բլոգեր:

«Հայաստանում օրեցօր ավելանում է համակարգիչ ունեցողների և ինտերնետ օգտագործողների քանակը, ուստի այս ամենի արդյունքում մեծանում է նաև շուկան և հայերեն բովանդակության պահանջարկը: Իրականում հայալեզու բովանդակության ավելացումը պայմանավորված է հայ ինտերնետ օգտագործողների և հայկական լսարանի մեծացմամբ»,- ասում է Վարդանյանը:

Փորձագետները շեշտում են նաև, որ այդ ավելացումը հիմնականում կատարվել է զուտ անհատների նախաձեռնությամբ կամ նվիրյալների ջանքերով: Իսկ նման մոտեցումը չի կարող համակարգային փոփոխություններ մտցել այս ասպրեզում:

Read More »Մաշտոցի հետևորդները համացանցում. հայերեն էլ-բովանդակությունը ավելանում է նվիրյալների շնորհիվ

Դեռևս 2009 թվականին համացանցի ներխուժումը Հայաստան գնահատվում էր 15 տոկոսից էլ ցածր, սակայն այսօր, ըստ տարբեր տվյալների, այդ ցուցանիշը մոտենում է 80 տոկոսի:

Հանրային ծառայությունները կարգավորող հանձնաժողովի 2010 թվականի հոկտեմբերի տվյալներով համացանցը հասանելի է Հայաստանի բնակչության գրեթե կեսին (47,1 տոկոս): Սակայն ըստ որոշ հայ փորձագետների՝ այս թվերը չափազանցված են:

Ակնհայտ է, որ այս ցուցանիշը բջջային հեռախոսներից համացանց մուտք գործելու հաշվին համացանցից օգտվողների թվի ավելացման արդյունք է: Հանձնաժողովի տվյալներով՝ լայնաշերտ, այսինքն՝ գերարագ ինտերնետից Հայաստանում օգտվում է ընդամենը 160 000 մարդ: «Ինտերնետ հանրություն» ՀԿ նախագահ Իգոր Մկրտումյանը կարծում է, որ Հայաստանում անհրաժեշտ է իրականացնել համացանցից օգտվողների քանակի անկախ ուսումնասիրություն:

Իր հերթին Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը նշում է, որ գոյություն չունի համացանցից օգտվողների հաշվարկման համընդհանուր հաստատված մեթոդիկա: «Եթե հաշվի առնենք սմարթֆոնների և բջջային հեռախոսների միջոցով շարժական ինտերնետից օգտվողներին, ապա 1, 5 միլիոն օգտվողների մասին վիճակագրությունը ճիշտ է: Սակայն պետք է նկատի ունենալ համացանցի իրական օգտագործողներին՝ DSL-ով, կապի օպտիկական ալիքներով», – ասում է Վարդանյանը:

Read More »Էլ-համայնքի քարտեզ. Հայաստանում համացանցից համակարգչով օգտվում է բնակչության մեկ երրորդը

Գյումրու ժուռնալիստների «Ասպարեզ» ակումբի խորհրդի նախագահ Լևոն Բարսեղյանը մտադրված է երկու ամսից նոր օրաթերթ հրատարակել Գյումրիում: Ըստ նրա, ի տարբերություն մեծ քանակությամբ օրաթերթեր ունեցող մայրաքաղաքի, մարզերում արդեն 20 տարի է’ ԶԼՄ-ի այս տեսակը գոյություն չունի, և անհրաժեշտ է վերականգնել վաղ առավոտյան թերթ ընթերցելու ավանդույթը:

«Ես ինքս մի շարք անգամներ տարբեր դոնորների բացատրել, խնդրել, համոզել եմ, որ մարզերում տպարանային աջակցություն ցուցաբերեն, տպարաններ հիմնելու համար գումարներ հատկացնեն, հիմա հույս ունենք, որ այդ հատկացումը կլինի, և վերջապես մեր քաղաքում երկար ընդմիջումից հետո մենք կունենանք մերը»,-պարզաբանում է Լևոն Բարսեղյանը:

Թերթի արտադրության հարցում Բարսեղյանը ակնկալում է թե’ տեղացի, թե’ դրսի դոնորների աջակցությունը, ըստ նրա, եթե անգամ աջակցություն չլինի, իրենք սեփական ուժերով կփորձեն հրատարկել թերթը: Ըստ Բարսեղյանի` ֆինանսական աջակցություն արդեն խոստացել են, բայց քանի դեռ պայմանագիրը կնքված չէ, ֆինանսավորողի անունը նշել չի ցանկանում:

Նախագծի համար «Ասպարեզ» ակումբի հաշվարկներով անհրաժեշտ է միանվագ 80 000 ԱՄՆ դոլարի ներդրում: Այս գումարի մեջ ներառված չեն խմբագրության ընթացիկ ծախսերը, որոնք ըստ Բարսեղյանի ամսեկան կկազմեն մոտ 4000 դոլար:

Read More »Վերականգնել ավանդույթը. Գյումրիի «Ասպարեզը» ուզում է ասպարեզ հանել օրաթերթ

Երկու գերմանացի լրագրողներ, ովքեր հոկտեմբերին ձերբակալվել էին Իրանում քարկոծման միջոցով մահապատժի ենթարկված կնոջ որդուց հարցազրույց վերցնելու համար, ազատ են արձակվել իրանական բանտից: Այս մասին կիրակի օրը հայտնել է Գերմանիայի Արտաքին գործերի նախարարության ներկայացուցիչը:

Ըստ նրա խոսքերի՝ լրագրողները կիրակի առավոտյան ժամանել են Գերմանիա երկրի արտաքին գործերի նախարար Գիդո Վեստերվելլեյի հետ, որը մեկնել էր Թեհրան նրանց տուն բերելու համար: 

Մարկուս Հելվիգը և Յենս Կոխը, որոնք աշխատում էին գերմանական «Bild» թերթում, դատապարտվել էին 20 ամսվա ազատազրկման Իրանի ազգային անվտանգության դեմ գործողությունների համար: Սակայն որոշ ժամանակ անց իրանական դատարանը փոխել էր դատավճիռը և սահմանել 50 000 ԱՄՆ դոլարի տուգանք յուրաքանչյուրի համար: Լրագրողներն ազատ արձակվեցին տուգանքի վճարումից անմիջապես հետո:

Գերմանացի լրագրողներին ձերբակալել էին հոկտեմբերին Սաքինե Մոհամադի Աշտիանիի որդու հետ հարցազրույց վերցնելու համար: Կնոջը դատապարտել էին մահապատժի քարկոծման միջոցով շնանալու և ամուսնու սպանությանը հանցակից լինելու համար:

Աղբյուր: http://www.rttnews.com

Read More »Իրանում գերմանացի լրագրողները ազատ են արձակվել և վերադառնում են տուն

Փետրվարի 18-ին թուրքական դատարանը մեղավոր ճանաչեց երեք լրագրողի հեղաշրջման ձգտող կազմակերպության հետ կապեր ունենալու մեջ: Քննադատներն այս գործն անվանում են երկրում մամուլի ազատության ոտնահարում:

«Oda TV» այլախոհ կայքի սեփականատեր Սոներ Յալչինի և նրա երկու գործընկերների տները հետախուզման են ենթարկվել ոստիկանության կողմից այն բանից հետո, երբ կայքում հրապարակվել են ոստիկանական հետաքննությունները քննադատող տեսանյութեր:

ԵՄ-ն և Լրագրողների պաշտպանության կոմիտեն (CPJ) մեղադրել են Թուրքիային հակաիշխանական քննադատական լուրերի և մեկնաբանությունների ճնշման մեջ: Մոտ 400 լրագրողներ, քաղաքական գործիչներ, ակադեմիկոսներ և թոշակի անցած սպաներ կանգնել են դատարանի առջև՝ մեղադրվելով Ռեջեփ Թայյիփ Էրդողանի կառավարությունը փոխելու միտում ունեցող «Էրգենեկոն» ցանցի հետ կապ ունենալու համար:  

Աղբյուր: The Washington Post

Read More »Թուրքիայում հեղաշրջման կասկածանքով ձերբակալվել է երեք լրագրող

Փետրվարի 21-ին «Ա1+» հեռուստաընկերության հիմնադիր «Մելտեքս» ՍՊԸ կդիմի վարչական դատարան` պահանջելու չեղյալ ճանաչել Հեռուստատեսության և ռադիոյի ազգային հանձնաժողովի (ՀՌԱՀ) 2010 թ-ի դեկտեմբերի 16-ի որոշումը, որով «Ա1+»-ը 13-րդ անգամ զրկվեց հեռուստաեթեր վերադառնալու հնարավորությունից:

«Մենք դատարանից խնդրելու ենք ճանաչել «Մելտեքս» ՍՊԸ խախտված իրավունքը և չեղյալ համարել ՀՌԱՀ-ի 96 Ա որոշումը, որը կայացվել է հանձնաժողովի անդամների միջամտությամբ’ ոչ անաչառ և ոչ օբյեկտիվ պայմաններում»,- ասաց «Մելտեքս» ՍՊԸ փաստաբան Տիգրան Տեր-Եսայանը:

Հեռուստաընկերությունների թվային հեռարձակման հաճախությունների մրցույթում ՀՌԱՀ-ի 96 Ա որոշման համաձայն հեռարձակման լիցենզիան տրամադրվեց «Արմնյուզ» ՓԲԸ, որը նույն կապուղու համար դիմած «Մելտեքս» ՍՊԸ միակ մրցակիցն էր:

«Ա1+»-ի մրցութային առաջարկը ՀՌԱՀ-ի կողմից գնահատվել էր ընդամենը 2 միավոր, քանի որ հանձնաժողովի 8 անդամներից 7-ը պարզապես զրո միավոր էին շնորհել:

Արդյունքների հրապարակումից հետո ՀՌԱՀ նախագահ Գրիգոր Ամալյանը մամլո ասուլիսում հայտարարել էր, որ «Մելտեքս» ՍՊԸ փաթեթը ցածր է գնահատվել, «քանի որ դրանում հայտնաբերվել են կեղծ փաստաթղթեր»: Խոսքը վերաբերում էր 280 հազար եվրո ներդրումների վերաբերյալ ներկայացված հավաստագրին, որի մեջ հանձնաժողովն անհամապատասխանություն էր հայտնաբերել:

Read More »Կրկին դատարան. «Ա1+»-ը չի հանդուրժի կատարված կողմնակալությունը

Փետրվարի 18-ին Վերաքննիչ քրեական դատարանը, չբավարարելով Փաշինյանի բողոքը, անփոփոխ թողեց Արագածոտնի մարզի ընդհանուր իրավասության դատարանի վճիռը:

Լրագրողի փաստաբանները պնդում են, որ Փաշինյանի պատժաչափը դիտավորյալ սխալ է հաշվարկվել, որի հետևանքով իրենց պաշտպանյալը անազատության մեջ է մնալու մինչև 2013 թվականի մայիսը, այսինքն` շուրջ հինգ ամիս ավելի:

«Իշխանություններն ամեն կերպ խոչընդոտում են Նիկոլ Փաշինյանի քաղաքական ու լրագրողական գործունեությանը և պատրաստվում են նրան ազատ արձակել այն ժամանակ, երբ արդեն ավարտված կլինեն հաջորդ նախագահական ընտրությունները»,- մեկնաբանեց փաստաբան Երվանդ Վարոսյանը:

Վճիռը դեռ չկայացրած` Նիկոլ Փաշինյանը հայտարարեց, որ այն ի վնաս իրեն է լինելու, քանի որ Հայաստանում չկան անկախ դատարաններ. դատավորները «կամակատարներ են», օրենքը չի գործում, և որ իշխանություններն այնպես «լեղաճաք են», որ իր հետ դեմ առ դեմ խոսելու փոխարեն, խոսում են «կրիմինալ թափթփուկի, օլիգարխ թափթփուկի և դատարանների միջոցով»:

«Հայկական ժամանակի» գլխավոր խմբագիրը նաև հայտարարեց, որ դատի է տալու քրեակատարողական հիմնարկների վարչությանը իր մասին «լկտի» ստեր տարածելու համար: ՔԿՀ-ն մամլո հաղորդագրություն էր տարածել այն մասին, որ Փաշինյանը ստում է, թե «Արթիկ» քրեակատարողական հիմնարկը չի ընդունում իր նամակները: Նիկոլ Փաշինյանի փաստաբանը հայտնեց, որ իրենք բողոքարկելու են մինչև եվրոպական դատարան:

Read More »Լուր Արթիկից. Փաշինյանի պատժաչափը մնաց անփոփոխ

«ԳԱԼԱ» հեռուստաընկերության հեռարձակումը կարող է դադարեցվել զուտ այն պատճառով, որ հեռուստաընկերությանը պատկանող հեռարձակող ալեհավաքը դատարանի որոշմամբ պետք է մեկ ամսվա ընթացքում ապամոնտաժվի հեռուստաաշտարակի վրայից:

Փետրվարի 17-ին նման որոշում ընդունեց Շիրակի մարզի ընդհանուր իրավասության դատարանը` այսպիսով վերջակետ դնելով երկու տարի ձգձգվող Գյումրու քաղաքապետարանն ընդդեմ «ԳԱԼԱ» ՀԸ սեփականատեր «Չապ» ՍՊԸ-ի և «Չապ» ՍՊԸ-ն ընդդեմ քաղաքապետարանի միացյալ գործերով դատաքննությանը:

Վեճի առարկան հեռուստաաշտարակն էր, որը գտնվում է Գյումրու Վազգեն Սարգսյան 6/1 հասցեում: Այն երկար ժամանակ անտեր էր, սակայն 2007 թ-ին սեփականաշնորհվեց Գյումրու քաղաքապետարանի կողմից, որն էլ պահանջեց ազատել հեռուստաաշտարակը «ԳԱԼԱ»-ին պատկանող սարքավորումներից:

Երկու տարի շարունակ երկարատև ընդմիջումներով գործը լսելուց հետո դատավոր Շիրակ Հակոբյանը ընթերցեց վճիռը` բավարարելով միայն Գյումրու քաղաքապետարանի պահանջը: «Հարկադրել հեռուստաընկերությանը մեկամսյա ժամկետում Վ.Սարգսյան 6/1 հասցեում գտնվող հեռուստաաշտարակի վրայից ապամոնտաժել «Չապ» ՍՊԸ ընկերությանը պատկանող հաղորդակի մաս հանդիսացող, հեռուստաաշտարակի գագաթնային հատվածում տեղադրված հաղորդիչ ալեսփյուռը (անտենան) և մալուխը», նշվում է դատավորի վճռի մեջ:

Read More »Գյումրվա փակուղին. «ԳԱԼԱ»-ն զրկվեց նաև աշտարակից օգտվելու իրավունքից