Երևան Archives

«Օգնական» թիմը ճանաչվեց լավագույնը Հեքըթոն[ՅԱՆ] մրցույթում

20/12/2011

Դեկտեմբերի 19-ին ամփոփվեցին «Հեքըթոն[ՅԱՆ] Երևան 2011» ծրագրավորման և նախագծերի ներկայացման լայնածավալ մրցույթի արդյուքները, և առավել հետաքրքիր նախագծերի հեղինակներն արժանացան պարգևների:

«Լավագույն նախագիծ» անվանակարգում հաղթող ճանաչվեց «Օգնական» թիմը, որն առաջարկում է ստեղծել «Ձայն» հեռախոսային հավելված` լսողության խանգարումներ ունեցողների համար: Ինչպես նշում է նախագծի հեղինակ, լրագրող Փառանձեմ Հովհաննիսյանը, նախագիծն արժանացել է Երևանի քաղաքապետարանի հավանությանը, որն էլ ստանձնել է ծրագրի իրականացման հովանավորչությունը:

Նույն նախագիծն արժանացավ նաև «Լավագույն սոցիալական նախագիծ» անվանակարգին, որի համար թիմը պարգևատրվեց 350 հազար դրամով:

Բացի «Օգնական» թիմից պարգևատրվեցին նաև «Open MS» թիմը` ճանապարհների խցանումների հաշվարկ կատարող ծրագրի համար` 1 մլն դրամով և «BigBrain» թիմը` «Kinect Stand» տեղեկատվական հարթակ նորագույն տեխնոլոգիաների ներդրմամբ նախագծի առաջարկի համար` 500 հազ. դրամով: Մրցանակներ ստացան նաև այլ թիմեր:

Առաջին հայկական Հեքըթոնը, նորարարական ծրագրերի առաջարկներով, նվիրված էր մայրաքաղաքի խնդիրների լուծմանը: Դեկտեմբերի 17-18-ը Երևանի քաղաքապետարանում ավելի քան 30 թիմեր 24 ժամ շարունակ աշխատում էին իրենց առաջարկած նախագծերի ուղղությամբ:

Մրցույթը կազմակերպել էին «Հանրային լրագրության ակումբն» ու «Մայքրոսոֆթ նորարարական կենտրոնը»: Միջոցառմանն աջակցում էր նաև Երևանի քաղաքապետարանը:

“Ognakan” (“Assistant”) Team – Best in Hackathon [YAN] Competition

20/12/2011

The results of the “Hackathon [YAN] Yerevan 2011” programming and projects’ presentation competition were summed up on December 19, and authors of the most interesting projects were awarded prizes.

Winner of the “Best Project” category was the “Assistant” team, which offers to create “A Voice” telephone attachment for the hearing impaired. According to the author of the project, journalist Parandzem Hovhannisyan, the project was approved by the Yerevan municipality, which has undertaken the project realization.

The same project won also the “Best Social Project” category, for which the team was awarded 350 thousand drams.

In addition to the “Assistant” team, awards were handed also to the “Open MS” team with a prize of 1 million drams for the “Calculation Program of Traffic Jam” and the “BigBrain” team of 500 thousand drams for the project proposal “Kinect Stand” on investing information platform for innovative technologies. Prizes were awarded also to other teams.

The first Armenian Hackathon, with innovative project proposals, was devoted to solving issues in Yerevan. For 24 hours, more than 30 teams worked on their proposed projects from December 17 to 18 in the Yerevan municipality.

The competition was organized by Public Journalism Club and the Microsoft Innovation Center. The event was supported also by the municipality.

«Apple»-ի համահիմնադիր Վոզնյակն արժանացավ Հայաստանի նախագահի մրցանակին, իսկ հայ գիքերը` լեգենդի հետ հանդիպմանը

12/11/2011

11.11.11 տարեթիվը, որին շունչները պահած սպասում էին աշխարհի շատ երկրներում, Հայաստանի համար նշանավորվեց առաջին անձնական համակարգչի լեգենդար հեղինակի և «Apple» ընկերության համահիմնադիր Սթիվ Վոզնյակի հետ հանդիպմամբ: Վոզնյակն արժանացել է ՏՏ ոլորտում համաշխարհային ներդրման համար Հայաստանի Հանրապետության նախագահի ամենամյա մրցանակին: Այսպիսի մրցանակ հանձնվում է երկրորդ անգամ. նախորդ տարի այն տրվել է «Intel» կորպորացիայի Տնօրենների խորհրդի նախագահ Քրեյգ Բարեթին:

Երևան կատարած երկօրյա այցի ընթացքում Վոզնյակը հանդիպել է ՀՀ նախագահի և վարչապետի, ինչպես նաև ՏՏ ոլորտի ներկայացուցիչների, Երևանի պետական ճարտարագիտական համալսարանի ուսանողների հետ, այցելել է Հայոց ցեղասպանության զոհերի հուշահամալիր:

«Աշխատանքը պետք է հաճույք պատճառի, ինչով էլ որ զբաղվես», – այս պարզ արտահայտությունը կարող է դառնալ նոյեմբերի 11-ին Երևանում տեխնոլոգիաների ոլորտի հսկաներից մեկի և հայ երիտասարդների միջև տեղի ունեցած հանդիպման կարգախոսը: «Արմենիա Մարիոթ» հյուրանոցի լեփ-լեցուն դահլիճի թե’ ուսանողներին և թե’ տեխնոլոգիայի ոլորտում արդեն կայացած մասնագետներին հետաքրքրում էր հանրահայտ «Apple» ընկերության պատմությունը, Վոզնյակի կենսափորձը, ինչպես նաև անվանակից Սթիվ Ջոբսի հետ նրա համագործակցությունը:

«Գրեթերթ»-ում հրատարակվել են 128 երիտասարդ հեղինակների ստեղծագործություններ

16/07/2011

Լրացավ «Գրեթերթ» գրական-երիտասարդական ամսաթերթի 5-րդ տարեդարձը: Այն տպագրվում է 2006 թվականից: «Գրեթերթի» հիմնադիրն է արձակագիր, դրամատուրգ, թարգմանիչ Հայաստանի գրողների միության անդամ Գուրգեն Խանջյանը, ով նաև թերթի գլխավոր խմբագիրն է։ Գուրգեն Խանջյանը ծնվել է Երևանում, ավարտել է Երևանի գյուղատնտեսական ինստիտուտը։

Հիմնադրելով պարբերականը Խանջյանը նպատակ դրեց համախմբել երիտասարդ ստեղծագործող ուժերին` արձակագիրներին, բանաստեղծներին, թարգմանիչներին։

«Գրեթերթում» տպագրվում են բացառապես երիտասարդ ստեղծագործողների գործեր՝ բանաստեցծություններ, պատմվածքներ, արձակ, գրաքննադատական հոդվածներ, էսսեներ և այլ գրական աշխատություններ: Այն տպագրվում է 1000 օրինակով:

2006-2011թթ, «Գրեթերթի» 19 համարներում լույս են տեսել 128 հեղինակներ հետևյալ գործերով՝ 375 բանաստեղծություն, 91 պատմվածք, 31 գրականագիտական հոդված, 23 թարգմանություն, 20 էսսե և այլն:

Հայկական ֆլեշմոբ դիվիզիան պատրաստ է չնախատեսված հավաքների

10/07/2011

Հայաստանում առաջին ֆլեշմոբ կազմակերպելու գաղափարն առաջացավ Երևանի թեյարաններից մեկում նախորդ տարի, երբ երեք ընկերներ Արմենը, Էդուարդը և Վաղինակը երկար քննարկումներից հետո որոշեցին գործի անցնել:

«Ֆլեշմոբ մշակույթը PR տեխնոլոգիայի մի ձև է: Արևմուտքում այդ մշակույթը ակտիվ զարգանում է, և մենք էլ ցանկացանք նման մի բան նախաձեռնել Երևանում: Առաջին ֆլեշմոբը որոշեցինք կազմակերպել ի հիշատակ Մեծ Եղեռնի զոհերի 95-ամյակին», – ասում է մասնագիտությամբ տնտեսագետ 22-ամյա Արմեն Սուքիասյանը:

Ուղիղ պայմանավորված ժամին Աբովյան փողոցի տարբեր կողմերից Ազնավուրի հրապարակում հավաքվեցին երիտասարդների խմբեր և, ուղղանկյան ձևով շարքերով կանգնելով, վեր բարձրացրին իրենց ձեռքի թղթերը: Արդյունքում սպիտակ ֆոնի վրա ուրվագծվեց 95 թիվը’ խորհրդանշելով Մեծ Եղեռնի 95-ամյակը:

Ֆլեշմոբն առաջացել է անգլերեն flash’ կայծակ և mob’ ամբոխ բառերից: Ֆլեշմոբը (կայծակնային ամբոխ) նախօրոք պլանավորված միջոցառում է, որի ժամանակ մի խումբ մարդիկ անսպասելի հայտնվում են որևէ հասարակական վայրում, մի քանի րոպեի ընթացքում կատարում նախօրոք պայմանավորված անտրամաբանական գործողություններ, իսկ հետո արագ ցրվում տարբեր կողմեր:

Ֆլեշմոբի հոգեբանական կողմն այն է, որ մասնակիցները ստեղծում են անհասկանալի, անհեթեթ իրավիճակ, սակայն պահում են իրենց այնպես, կարծես ամեն ինչ սովորական է: Ֆլեշմոբի սցենարը պետք է ունենա անհեթեթ և անտրամաբանական բնույթ, սակայն մասնակիցները պետք է լինեն լուրջ և սթափ:

Wi-Fi անիվների վրա. Երևանի տրոլեյբուսները հնարավոր է ապահովվեն ինտերնետով

05/07/2011

Քաղաքային ավտոբուսի վարորդ Գևորգ Պողոսյանի աշխատանքային պարտականություններին վերջերս ավելացել է ևս մեկը: Նա ամեն առավոտ ճանապարհ դուրս գալուց առաջ նախ պետք է իր անիվների վրա գտնվող աշխատավայրում ապահովի Wi-Fi` միացնելով ավտոբուսում տեղադրված համապատասխան սարքը:

Գևորգը 22 համարի երթուղու այն միակ ավտոբուսի վարորդն է, որը հագեցվել է Wi-Fi ապահովող սարքով: Նմանատիպ անլար ինտերնետով ապահովված են նաև 3, 15, 16 և 28 երթուղիների մեկական ավտոբուսներ:

Վարորդ Գևորգը հավանություն է տալիս այս նորամուծությանը, թեև դեռ ուղևորների ավելացում չի նկատում: Վերջինս բացատրում է նրանով, որ 22 երթուղուց օգտվում են հիմնականում երիտասարդները և քանի որ ուսումնական տարին ավարտվել է, նրանց թիվն էլ նվազել է:

Բայց Գևորգը լավ նորություն էլ ունի: Ասում է Wi-Fi-ի շնորհիվ արդեն երկու մշտական երիտասարդ հաճախորդ ունի, ովքեր վաղ առավոտյան գալիս են, սպասում են 22 համարի ավտոբուսին և մեկժամյա երթևեկության ընթացքում օգտվում են ինտերնետից:

«Մի քանի օր առաջ էլ մի մարդ նստեց: Վեց ռեյսի համար վճարեց 600 դրամ, գնաց վերջում նստեց ու իրա նոթբուքով սկսեց աշխատել: Ով որ հասկացող ա, օգտվում ա», -ասում է Գևորգը և եզրակացնում, որ եթե նա գնար որևէ ինտերնետ-ակումբ, հաստատ ավելի շատ գումար կծախսեր: «Ինքը երևի հաշվել ա, տեսել, որ 6 ռեյսի ընթացքում իրա գործը կանի, սենց իրա համար ձեռնտու ա, ու եկել նստել, իրա համար հանգիստ աշխատել ա»:

«Ֆեթ դը լա մյուզիք». երաժշտության տոն Ֆրանսիական համալսարանի բակում

23/06/2011

Հունիսի 21-ին Հայաստանի ֆրանսիական համալսարանի բակում կազմակերպվել էր ֆրանսիական «Ֆեթ դը լա մյուզիք» ամենամյա միջոցառումը, որի հիմնական ելույթ ունեցողները համալսարանի ուսանողությունն էր: Բայց կային նաև 2 հրավիրված խմբեր` «Սիմա Քոնինգհամ» և «Փինք Սիթի»:

Մասնակիցները կատարում էին համարներ ֆոլք-ջազի, ֆրանսիական շանսոնի և հայկական ֆոլքի ժանրերում:

«Ֆեթ դը լա մյուզիքը» ֆրանսիական երաժշտության տոն է, որը նշում են աշխարհի ավելի քան 400 քաղաքներում: Հայաստանում այն նշվում է 2007 թ-ից: «Ֆեթ դը լա մյուզիք» երաժշտության տոնի մտահաղացումը ամերիկացի երաժիշտ Ժոել Կոհենինն է, ով 1966թ-ին աշխատում էր «Ռադիո Ֆրանսում»: 18 տարի անց միջոցառումը կրեց պաշտոնական բնույթ` դառնալով «Երաժշտության տոն»: 2001թ-ից տոնն ամբողջությամբ միջազգայնացվեց` տարածվելով ավելի քան 130 երկրներում:

«Իմաստն այն է, որ այս օրը նույնիսկ ամենահայտնի երաժիշտները քաղաքի տարբեր վայրերում անվճար երգեն և նվագեն»,- ասում է Հայաստանում միջոցառման պատասխանատու Ավետիս Գասպարյանը:

Հայաստանի Ֆրանսիական համալսարանը` հանդիսանալով Ֆրանկոֆոնիայի և ֆրանսիական մշակույթի դեսպանը Հայաստանում, այս տարի որոշեց առաջին անգամ կազմակերպել այս տոնը համալսարանի բակում: «Նախորդ տարիներին այն նշվում էր քաղաքի կենտրոնական փողոցներում և հնչում էին երաժշտական տարբեր ժանրեր: Այս տարի մենք որոշեցինք միավորել բոլոր այդ ժանրերը և նշել այն Ֆրանսիական համալսարանի բակում»,- ասում է Գասպարյանը:

Mega Мagazines. ամսագրերը ծաղկում են թերթերի մոխրագույն ֆոնին

19/04/201114/02/2022

Հայաստանում գնալով աճում է ժամանցային ամսագրերի թիվը, այն դեպքում, երբ օրաթերթերի խմբագիրները բողոքում են թերթերի ընթերցանության ցածր մակարդակից: Ըստ ՀՀ արդարադատության նախարարության տվյալների՝ վերջին երեք տարվա ընթացքում Հայաստանում ավելացել է 52 անուն ժամանցային թերթ ու ամսագիր: Եվ այս թիվը կազմում է պետռեգիստրում գրանցված ընդհանուր` 1159 անուն տպագիր լրատվամիջոցների ընդամենը 4%-ը: Սրանցից 759-ը թերթեր են, իսկ 364-ը ամսագրեր:

«Պսպղուն» ամսագրերի շուկան Հայաստանում սկսեց զարգանալ 2004 թվականից: Հենց այդ ժամանակ լույս տեսան այնպիսի ամսագրեր, ինչիպիսիք են «Աֆիշա»-ն, «Elite Life»-ը, «Երևան»-ը: Հետագայում դրանց թիվը կտրուկ կաճի և հիմնականում կքարոզեն շքեղ ապրելակերպ` թանկարժեք մեքենաներ, եվրոպական բրենդերի հագուստ և կարևորը, որ ամեն ինչ էքսկլյուզիվ` հատուկ ամսագրի ընթերցողի համար:

Մինչդեռ փոքր շուկայի հետևանքով, որը գործնականում սահմանափակվում է համահայկական մայրաքաղաքով, նմանատիպ ամսագրերից շատ քչերին է հաջողվում կայուն դիրք գրավել: «Design Delux» ամսագրի գլխավոր խմբագիր Հասմիկ Շամցյանի խոսքերով՝ ամսագրի բովանդակությունը չի սահմանափակվում անվանման թելադրած թեմայով: «Մենք փորձում ենք ընթերցողների մեծ լսարան հավաքել ինչպես դիզայնի մասնագետների, այնպես էլ ոչ մասնագետների շրջանում: Այդ պատճառով էլ գրում ենք ոչ միայն ճարտարապետության և դիզայնի մասին, այլ նաև մշակութային իրադարձությունների մասին առհասարակ», – ասում է Շամցյանը:

Ընտանի կենդանիների տուրք «շնից մազ պոկելու» սկզբունքով

04/01/201112/02/2022

Ընտանի կենդանիների տուրքի մասին Երևանի քաղաքապետարանի ավագանու 2010 թվականի որոշումը դժգոհություններ առաջացրեց, իսկ որոշման թերի ձևակերպումները տարընթերցման առիթ դարձան այն բոլոր բնակիչների համար, ովքեր իրենց բնակարանում կամ առանձնատան բակում որևէ թռչուն կամ չորքոտանի կենդանի են պահում:

Համաձայն այդ որոշման այսուհետ Երևանի այն բնակիչները, ովքեր ունեն ընտանի կենդանիներ, պետք է յուրաքանչյուր կենդանու համար տարեկան վճարեն 5000 դրամ պետտուրք: Որոշման հետ համաձայն չէին թե մայրաքաղաքի բազմաբնակարան շենքերի, թե առանձնատներում ապրող բնակիչները:

Սկզբնական շրջանում բողոքի ալիքը շատ ավելի մեծ էր, քանի որ պարզաբանման կարիք կար, թե որ ընտանի կենդանիներին է վերաբերում այս որոշումը: Բանը նրանում է, որ մայրաքաղաքում կան թաղամասեր, օրինակ` Կոնդը, Սարի թաղը կամ ծայրամասային Սիլիկյան թաղամասը (հայտնի` որպես Երրորդ գյուղ), որտեղ առկա առանձնատների բնակիչներից շատերը իրենց տան բակում պահում են մանր և/կամ խոշոր եղջերավոր ընտանի կենդանիներ:

Բողոքի ալիքը նվազեցնելու նպատակով քաղաքապետարանը հանդես եկավ մամլո հաղորդագրությամբ` պարզաբանելով, որ տուրքը վերաբերում է միայն շուն և կատու պահողներին: